Radio Plus 102.2 FM
call + 383 44 776 000
Dëgjo Radio Plus Live
Prodhuesit perëndimorë të automjeteve nën shqetësime për një “pushtim” të veturave elektrike të lira kineze në Evropë, kanë kërkuar ulje të kostos së prodhimit për modelet e reja elektrike.
Një kërkesë e tillë është shtruar nga Renaulti i Francës, i cili të enjten ka thënë se synon ta ulë koston e prodhimit për këto modele për rreth 40 për qind.
Shefi i financave i këtij prodhuesi, Thierry Pieton, ka thënë se mënyra më e mirë për të shmangur konkurrencën e çmimeve është që kompania të ulë kostot e veta të zhvillimit dhe prodhimit.
Derisa ulja prej 40 për qind është synuar nga viti 2027 e tutje, shefi ekzekutiv Luca de Meo ka thënë se grupi do të fillojë të shohë kosto dukshëm më të ulëta të prodhimit nga gjysma e dytë e këtij viti, falë një rënie në kostot e lëndëve të para.
Në vitin 2022, prodhuesit kinezë të veturave kishin një pjesë prej 9 për qind të tregut evropian të automjeteve elektrike, gati dyfishi i shifrës së vitit të kaluar, sipas parashikimeve të konsulencës “Inovev”, ndërsa ritmi po vazhdon të rritet.
Ashtu si prodhuesit e tjerë të automjeteve elektrike, Renaulti gjithashtu përballet me presion të shtuar nga rivali amerikan Tesla, i cili ka ulur çmimet disa herë këtë vit.
Carlos Tavares, drejtor ekzekutiv i prodhuesit të veturave Peugeot-to-Fiat Stellantis paralajmëroi të mërkurën se konkurrenca me prodhuesit kinezë do të ishte "brutale".
Mercedes-Benz ka thënë të enjten se i qëndron strategjisë së tij dhe nuk do të përfshihej në një luftë çmimesh për të "blerë" pjesën e tregut në Kinë./koha/