Shkolla e mesme “Nazmi Hoxha” në Gjilan, është bërë me laborator të shkencave të natyrës, i cili u mundëson nxënësve të saj të zhvillojnë praktikën në lëndët matematikë, fizikë, kimi dhe biologji.

Kryetari i Komunës, Alban Hyseni, i cili ka prerë shiritin e përurimit, së bashku me nënkryetaren Leonora Morina Bunjaku dhe drejtoreshën e Arsimit, ka thënë se investimi arrin vlerën 49 mijë euro.

“Sot përuruam laboratorin e shkencave të natyrës në shkollën "Nazmi Hoxha", ku nxënësit e saj tani do të kenë mundësinë të zhvillojnë praktikën në lëndët matematikë, fizikë, kimi dhe biologji”, ka thënë Hyseni.

Për më tepër, kryetari Hyseni nënvizoi se kjo është shkolla e katërt e cila tani posedon laboratorin shkencor dhe paralajmëroi se së shpejti edhe tri shkolla të tjera do të pajisen me laboratorë shkencorë: Gjimnazi i shkencave natyrore "Xhavit Ahmeti", SHFMU "Abaz Ajeti" dhe SHFMU “Skënderbeu” në Përlepnicë.

Ai ka nënvizuar faktin se pajisja e shkollave me laboratorë ka qenë zotim i qeverisjes së tij. 

“Kësisoj po përmbushim zotimin tonë për pajisjen e të gjitha shkollave me laboratorë dhe kabinete të punës, me qëllim që nxënësit dhe mësimdhënësit të kenë një mjedis bashkëkohor të mësim-nxënies dhe mësim-dhënies”, ka thënë Hyseni.