Airbnb ka ndërmarrë një hap të rëndësishëm drejt transparencës dhe përballueshmërisë për përdoruesit e saj në mbarë botën. Duke filluar nga e hëna, platforma do të shfaqë automatikisht çmimin total të qëndrimit për çdo listim – përfshirë taksat dhe tarifat shtesë – që në fillim të kërkimit.

Ky ndryshim i largon përdoruesit nga metoda e vjetër, ku çmimi i shfaqur ishte vetëm për një natë dhe tarifat shfaqeshin në fund të rezervimit. Sipas një postimi në blogun zyrtar të kompanisë, ky përditësim është pjesë e përkushtimit të Airbnb për "përballueshmëri dhe transparencë".

Ky zhvillim vjen pak para se të hyjnë në fuqi rregullat e reja federale në SHBA më 12 maj, të cilat ndalojnë "tarifat e fshehura" në sektorin e hoteleve, bileta koncerteve dhe akomodimeve afatshkurtra. Kompanitë do të jenë të detyruara të shfaqin çmimin total për konsumatorët përpara se ata të bëjnë pagesën.

Airbnb e kishte nisur këtë praktikë në vitin 2019 në disa vende si Australia, Kanadaja dhe Evropa. Në SHBA dhe Kanada, opsioni ishte i disponueshëm që nga viti 2022 dhe është përdorur nga mbi 17 milionë përdorues.

Gjithashtu, kompania thekson se përfshirja e çmimit total ka ndikuar në uljen e tarifave të pastrimit, me afro 300,000 listime që i kanë ulur ose hequr plotësisht këto tarifa në vitin 2023 – përfshirë 40% të listimeve aktive.