Pas ndarjes nga jeta të aktorit Carl Weathers në shkurt të këtij viti, Disney dhe Pixar kanë njoftuar se aktori legjendar i "Ghostbusters", Ernie Hudson, do ta zëvendësojë atë në rolin e Combat Carl në filmin e ardhshëm Toy Story 5, i cili pritet të publikohet më 19 qershor 2026.

Combat Carl u shfaq për herë të parë në specialen televizive Toy Story of Terror në vitin 2013 dhe më pas edhe në Toy Story 4. Ky personazh i dashur dhe heroik ishte një nga rolet ikonike të Weathers.

Në kapitullin e ri të Toy Story, Tom Hanks dhe Tim Allen do të rikthehen në rolet e tyre të njohura si Woody dhe Buzz Lightyear. Tim Allen ka konfirmuar gjithashtu se filmi i pestë do të ketë më shumë fokus tek personazhi Jessie, e dubluar nga Joan Cusack. Regjinë do ta bëjë Andrew Stanton, fitues i Oscar-it për filmat WALL-E dhe Finding Nemo.