Tregu global i robotëve humanoidë mund të arrijë vlerën e 1.7 trilion dollarëve deri në vitin 2050, sipas analizave nga UBS. Sipas këtij raporti, deri në dhjetë vitet e ardhshme pritet të jenë në përdorim rreth 2 milion robotë, ndërsa deri në mesin e shekullit, kjo shifër mund të rritet deri në 300 milionë.

Ky zhvillim pritet të ndihmojë në zbutjen e mungesës së fuqisë punëtore të shkaktuar nga plakja e popullsisë dhe produktiviteti i ulët në disa industri të shërbimit.

Sipas UBS, përdorimi i gjerë i robotëve humanoidë nuk do të ndodhë para vitit 2030, për shkak të sfidave që lidhen me përparimin e inteligjencës artificiale, qasjen në të dhëna të mëdha dhe barrierat rregullative.

Megjithatë, me përmirësimin e prodhimit dhe zinxhirëve të furnizimit, kostoja e ndërtimit dhe operimit të këtyre robotëve pritet të bjerë me më shumë se 70% në dy dekadat e ardhshme.

Rritja e përdorimit të robotëve do të ketë ndikim të madh ekonomik: vetëm nga prodhimi i 86 milion robotëve deri më 2050, industria e automatizimit mund të fitojë 400 miliardë dollarë, ndërsa furnizuesit e metaleve të rralla rreth 7 miliardë dollarë – shumëfish më shumë se nivelet aktuale të vitit 2025.