Në një përpjekje për të përmirësuar shëndetin publik, shumë shtete amerikane po kufizojnë ose po ndalojnë përdorimin e ngjyruesve sintetikë ushqimorë, për shkak të shqetësimeve për ndikimin në kancer, probleme neuro-zhvillimore tek fëmijët dhe sjelljet e tyre. Pas ndalesave në Kaliforni, 25 shtete të tjera kanë nisur procese të ngjashme, ndërsa FDA po planifikon të ndihmojë industrinë në heqjen graduale të ngjyrave të prodhuara nga derivatet e naftës.

Sidoqoftë, ekspertët theksojnë se problemi nuk mbaron me eliminimin e ngjyrave — sepse shumica e këtyre produkteve janë ushqime ultraprocesuara, me sasi të larta sheqeri, yndyre të ngopur dhe kripë, që lidhen me sëmundje të rënda si diabeti, obeziteti apo sëmundjet kardiovaskulare. Studimet tregojnë se produktet me ngjyrues sintetikë kanë mesatarisht 141% më shumë sheqer krahasuar me ato pa ngjyrues, duke i bërë edhe më të dëmshme për shëndetin.

Industria ushqimore ka nisur të zhvendoset drejt përdorimit të ngjyrave natyrale, ndërsa kompani të mëdha si Kraft Heinz dhe Nestlé kanë premtuar heqjen e ngjyrave sintetikë brenda viteve të ardhshme. Por ekspertët paralajmërojnë që edhe me ngjyra natyrale, produktet ultraprocesuara mbeten të pasura me përbërës industrialë, të cilët ndikojnë në varësinë dhe tejkonsumimin.

Për të përmirësuar vërtet shëndetin publik, specialistët këshillojnë që të promovohet konsumimi i ushqimeve të plota, të freskëta dhe të paindustralizuara, së bashku me etiketim më të mirë dhe edukim ushqimor në shkolla.