Administrata Amerikane e Ushqimit dhe Barnave (FDA) ka dhënë miratimin për një test të ri gjaku që ndihmon në vlerësimin e sëmundjes së Alzheimerit.

Testi, i quajtur Elecsys pTau181, është zhvilluar nga Roche Diagnostics në bashkëpunim me Eli Lilly dhe është projektuar për t’u përdorur nga mjekët e kujdesit parësor tek pacientët mbi 55 vjeç që shfaqin shenja të rënies së kujtesës.

Sipas kompanisë, testi ndihmon në përjashtimin e rasteve që nuk kanë gjasa të jenë Alzheimer, ndërsa për pacientët me rezultat pozitiv rekomandohen ekzaminime të mëtejshme.

Elecsys pTau181 mat nivelet e proteinës pTau181 në plazmën e gjakut – një biomarkues që lidhet drejtpërdrejt me Alzheimerin dhe sëmundje të tjera neurodegjenerative.

Ky është testi i dytë i këtij viti që merr miratimin e FDA për diagnostikimin e Alzheimerit, pas Lumipulse G pTau217/ß-Amiloid 1-42 të kompanisë Fujirebio, i cili u miratua në muajin maj.