Mbyllja nisi më 1 tetor, pasi Kongresi nuk arriti të miratojë një marrëveshje të re për financimin e qeverisë. Si pasojë, mijëra punëtorë federalë kanë mbetur pa pagë, ndërsa miliona qytetarë janë prekur nga ndërprerja e shërbimeve publike.

Sekretari amerikan i Transportit paralajmëroi se disa pjesë të hapësirës ajrore mund të mbyllen nëse kriza vazhdon, pasi mbi 13 mijë kontrollorë të fluturimeve po punojnë pa pagesë.

Një tjetër shqetësim i madh është programi i ndihmës ushqimore SNAP, nga i cili varen rreth një në tetë amerikanë. Për shkak të mungesës së fondeve, vetëm një pjesë e pagesave të muajit është realizuar.

Ndërsa përpjekjet për kompromis vazhdojnë, demokratët kërkojnë shtyrjen e subvencioneve për kujdesin shëndetësor të shtresave të ulëta, ndërsa republikanët akuzojnë kundërshtarët se po mbajnë peng qeverinë.

Lideri republikan John Thune tha se beson në “një ndjenjë pozitive” për një marrëveshje të afërt, ndërsa afati i ri i mundshëm për hapjen e qeverisë mbetet i paqartë.