Sektori i bujqësisë në Kosovë ka vazhduar të jetë një nga shtyllat kryesore të ekonomisë gjatë viteve 2024/2025, duke kontribuar në sigurimin e ushqimit për popullatën dhe në rritjen e eksportit të produkteve bujqësore.

Sipas Ministrisë së Bujqësisë, Pylltarisë dhe Zhvillimit Rural, sipërfaqja e tokës së punueshme ka arritur në 420,229 hektar, me një tkurrje të lehtë prej 0.11% krahasuar me vitin 2023. Ndërkohë, është shënuar rritje e sipërfaqes së arave dhe fidanishteve, ndërsa kopshtet, plantacionet e pemëve dhe vreshtat kanë pësuar rënie.

Tokë djerrinë e papunuar për vitin 2024 është regjistruar 6,429.78 hektar, rritje kjo që lidhet me zvogëlimin e sipërfaqeve të perimeve, pemëve dhe vreshtave.

Regjistrimi i fundit i bujqësisë tregon se Kosova ka 130,775 ekonomi bujqësore, të cilat menaxhojnë mesatarisht 3.9 hektar tokë, duke e bërë sektorin bujqësor një komponent të rëndësishëm të ekonomisë vendore.

Sa i përket eksporteve, gjatë vitit 2024 ato kanë arritur vlerën prej 170.8 milionë euro, me rritje prej 15.4% krahasuar me vitin paraprak. Rritja më e madhe është shënuar në eksportin e produkteve të pemëve dhe arroreve, përgatitjeve të ngrënshme dhe produkteve të drithërave, kryesisht drejt tregjeve të Bashkimit Evropian dhe rajonit.

Ministria vlerëson se, megjithë rezultatet pozitive, rënia e disa kategorive dhe rritja e tokës djerrinë tregojnë nevojën për menaxhim më të mirë, investime në teknologji dhe përmirësim të kapaciteteve të fermerëve, për të siguruar zhvillim të qëndrueshëm në të ardhmen.