Jeta e Travis Kelce ka marrë një kthesë të papritur që nga nisja e lidhjes me Taylor Swift, dhe vetë ylli i NFL ka zbuluar disa nga ndryshimet më interesante në stilin e tij të jetesës.

Në podkastin New Heights, që ai e drejton së bashku me vëllain e tij Jason Kelce, Travis pranoi se këngëtarja ka ndikuar ndjeshëm në zakonet e tij të përditshme.

Mes humorit dhe batutave, ai tregoi se ka filluar të provojë ushqime që më parë nuk do t’i kishte konsideruar kurrë.

“Fillova të sillem si burrë kur jam pranë saj”, u shpreh ai me shaka, duke ia atribuar këtë ndryshim natyrës aventuriere të Swift.

Deklaratat vijnë në një kohë kur spekulimet për një martesë të afërt mes çiftit janë shtuar ndjeshëm. Edhe pse janë përmendur data të mundshme si 13 qershori apo 3 korriku, deri tani nuk ka asnjë konfirmim zyrtar.

Ndërkohë, çifti vazhdon të mbajë jetën private larg vëmendjes së publikut, përfshirë edhe planet për ceremoninë, duke shtuar misterin rreth asaj që fansat e quajnë tashmë “dasma e vitit”.