Grupi legjendar The Rolling Stones ka konfirmuar zyrtarisht se albumi i tyre më i ri, Foreign Tongues, do të publikohet më 10 korrik.

Lajmi u bë i ditur përmes rrjeteve sociale të grupit, duke i dhënë fund spekulimeve që kishin qarkulluar ditët e fundit. Ky projekt vjen rreth tre vjet pas suksesit të albumit Hackney Diamonds, i cili fitoi çmim Grammy dhe kryesoi toplistat në shumë vende.

Albumi i ri do të përmbajë 14 këngë dhe do të promovohet paraprakisht me singllin In the Stars, një këngë me ritëm energjik dhe atmosferë dinamike. Paralelisht është publikuar edhe kënga hapëse e albumit, Rough and Twisted.

Ndërkohë, versioni fizik “In the Stars/Rough and Twisted” do të dalë më 15 maj.

Para njoftimit zyrtar, grupi rriti kureshtjen e fansave duke publikuar në edicion të limituar këngën “Rough and Twisted” nën pseudonimin “The Cockroaches”.

Albumi është regjistruar në Metropolis Studios në Londër, në bashkëpunim me producentin fitues të Grammy-t, Andrew Watt, i cili kishte punuar edhe në albumin e mëparshëm të grupit.

Mick Jagger u shpreh se procesi i realizimit ishte intensiv dhe shumë energjik.

“Kishim 14 këngë fantastike dhe punuam sa më shpejt që ishte e mundur. Ishin javë shumë intensive”, tha ai.

Ndërsa Keith Richards theksoi se albumi vazhdon frymën e “Hackney Diamonds” dhe se atmosfera londineze pati rol të rëndësishëm në procesin krijues.