Sulmuesi i Real Madrid, Kylian Mbappé, është në rrugë të mirë për të qenë i gatshëm për “El Clasico” ndaj Barcelona këtë të diel.

Përballja e madhe në La Liga nis në orën 21:00 dhe mund të jetë vendimtare për garën e titullit, pasi çdo rezultat tjetër përveç fitores së Real Madridit do t’ia siguronte matematikisht trofeun Barcelonës.

Mbappé kishte ngritur dyshime për pjesëmarrjen e tij, pasi mungonte në stërvitje që nga momenti kur u zëvendësua në ndeshjen ndaj Real Betis për shkak të një problemi në muskujt e kofshës.

Francezi u rikthye në qendrën stërvitore Valdebebas gjatë javës dhe, sipas raportimeve nga Diario AS, ai mori pjesë në një pjesë të stërvitjes me grupin, ndërsa pjesën tjetër e zhvilloi individualisht me fizioterapistët.

Testet mjekësore kanë konfirmuar se sulmuesi ka shmangur një dëmtim serioz muskulor dhe vuan vetëm nga një tendosje, çka i hap rrugën rikthimit për sfidën ndaj Barcelonës.

Megjithatë, sipas raportimeve, është më e mundshme që Mbappé ta nisë ndeshjen nga banka rezervë sesa si titullar.