Presidenti i Shteteve të Bashkuara, Donald Trump, ka lënë të hapur mundësinë për të zgjatur edhe një herë afatin për kompaninë kineze ByteDance që të shesë asetet amerikane të aplikacionit TikTok, të përdorur nga mbi 170 milionë amerikanë. Afati aktual është 19 qershori.

Në një intervistë për NBC News, e regjistruar në rezidencën e tij në Mar-a-Lago, Trump tha: “Do të doja që marrëveshja të ndodhte, por nëse nuk ndodh, mund ta zgjatim pak afatin.”

Trump pranoi se ka një "dobësi të veçantë" për TikTok, pasi aplikacioni e ndihmoi të lidhej me votuesit e rinj gjatë zgjedhjeve presidenciale të vitit 2024. “TikTok është interesant dhe do të mbrohet,” u shpreh ai.

Fillimisht, një marrëveshje ishte në proces që do të kalonte operacionet amerikane të TikTok në një kompani të re të bazuar në SHBA, me investitorë amerikanë në shumicë, por kjo marrëveshje u pezullua pasi Kina kundërshtoi pas shpalljes së tarifave të reja nga Trump ndaj mallrave kineze.

Ndërkohë, senatorët demokratë kanë deklaruar se Trump nuk ka autoritet ligjor për të zgjatur afatin dhe se marrëveshja që po shqyrtohej nuk e përmbushte ligjin.

Burime pranë investitorëve amerikanë të ByteDance kanë treguar se puna për marrëveshjen vazhdon, por ajo nuk mund të finalizohet pa një zgjidhje paraprake për çështjen e tarifave mes Shtëpisë së Bardhë dhe Pekinit.

Trump konfirmoi gjithashtu se Kina dëshiron një marrëveshje, për shkak të ndikimit të madh që tarifat 145% po kanë në ekonominë kineze. Ai nuk është i gatshëm t’i heqë tarifat për të nisur bisedimet, por la të kuptohet se ato mund të ulen më vonë si pjesë e një marrëveshjeje më të gjerë tregtare.