Një test i ri gjenetik, i përshkruar si “ndryshim jete" nga kirurgët, mundëson diagnozën e saktë të llojeve të tumoreve në tru brenda pak orësh – një përparim i madh krahasuar me procesin aktual që shpesh zgjat disa javë.

Metoda është zhvilluar nga shkencëtarët e Universitetit të Nottinghamit në bashkëpunim me klinicistët e Nottingham University Hospitals NHS Trust (NUH), dhe tashmë ka pasur sukses të plotë në 50 operacione ku është aplikuar.

Deri më sot janë identifikuar mbi 100 lloje të ndryshme të tumoreve në tru, dhe saktësia e diagnozës është thelbësore për të përcaktuar trajtimin më efektiv për secilin pacient. Deri më tani, kampionët merren gjatë operacionit dhe analizohen në laborator – një proces që mund të zgjasë deri në 8 javë.

Ky test i ri, që përdor teknologjinë e avancuar të sekuencimit të ADN-së përmes nanopore-ve dhe softuerit ROBIN, mund të japë rezultate në vetëm 90 minuta – shpeshherë gjatë vetë operacionit. Kjo i mundëson kirurgëve të marrin vendime në kohë reale për të kryer ndërhyrje më të thella nëse është e nevojshme, si dhe fillimin më të shpejtë të trajtimeve me kimioterapi apo radioterapi.

Një nga rastet që e pasqyron qartë rëndësinë e këtij përparimi është ai i një vajze njëvjeçare që priti dy javë për diagnozën, kohë gjatë së cilës duhej përballuar një stres i madh emocional. Nëse testi i ri do të ishte aplikuar, një nga ndërhyrjet kirurgjikale do të ishte shmangur.

Pacienti Charles Trigg, i diagnostikuar me tumor agresiv në tru, e përshkroi këtë përvojë si lehtësim: “E vërteta mund të jetë e rëndë, por të paktën e di me çfarë po përballesh dhe mund të planifikosh hapin tjetër.”

Shumë spitale në Mbretërinë e Bashkuar tashmë janë duke e testuar këtë metodë në mënyrë të pavarur. Sipas The Brain Tumour Charity, kjo teknologji mund të transformojë kujdesin ndaj pacientëve dhe të ulë në mënyrë drastike periudhën e pasigurisë që shoqëron pritjen për një diagnozë të saktë.