Pas më shumë se dy dekadash, Freaky Friday kthehet me një vazhdim të shumëpritur: Freakier Friday. Jamie Lee Curtis dhe Lindsay Lohan ribashkohen për të sjellë një histori të re që eksploron marrëdhëniet nënë-bijë, këtë herë nga një perspektivë më e pjekur.

Filmi e gjen Annën (Lohan) tashmë si nënë të një vajze 15-vjeçare dhe me sfidat që vijnë nga një familje e përzier. Si në origjinalin e vitit 2003, ndërrimi i trupave ndodh sërish – por kësaj radhe, bëhet fjalë për një katërshe që ndërron trupat mes tyre.

Në premierën në Londër, Lohan tha se ndjente një lidhje të fortë emocionale me filmin dhe se rikthimi në aktrim pas një kohe të gjatë kishte qenë i natyrshëm. Ajo theksoi se përvoja si nënë e ka ndihmuar të lidhë më shumë me tematikën e filmit.

Jamie Lee Curtis, e cila pati ide për vazhdimin dhe kontaktoi vetë me Disney, tha se kishte pritur që Lohan të arrinte moshën e duhur për ta luajtur një nënë adoleshente. Ajo shtoi se filmi është i rëndësishëm në një kohë kur bota ka mungesë mirëkuptimi dhe empatie.

Filmi do të shfaqet nga data 8 gusht dhe vjen në kohën kur shumë filma kult po rikthehen me vazhdime, përfshirë edhe Bend It Like Beckham dhe The Devil Wears Prada.