Sean 'Diddy' Combs do të vazhdojë të qëndrojë në burg deri në seancën e shpalljes së dënimit më 3 tetor, pasi kërkesa e tij për lirim me kusht është refuzuar.

Moguli i muzikës, i dënuar në korrik për dy akuza të transportimit me qëllim prostitucioni, kërkoi të lirohej përkohësisht, por gjykatësi Arun Subramanian vendosi të hënën që ai të mbetet në paraburgim.

Në vendimin e tij, Subramanian deklaroi se Combs nuk kishte paraqitur "arsye të jashtëzakonshme" që do të justifikonin lirimin.
"Përsa i përket rrezikut për arratisje apo rrezikut për të tjerët, Combs nuk arrin të plotësojë barrën e provës me fakte të qarta dhe bindëse, siç u theksua në seancën e 2 korrikut 2025," shkroi gjykatësi.

Ai shtoi gjithashtu se rritja e shumës së garancisë apo kushte shtesë të lirimit nuk e ndryshojnë situatën, për shkak të rrethanave dhe barrës së rëndë të provës që Combs duhet të përmbushë.

Pavarësisht ankesave të Combs për kushtet në Qendrën e Paraburgimit Metropolitan në Brooklyn, Subramanian vuri në dukje se stafi i burgut kishte arritur ta mbante të sigurt dhe t’u përgjigjej nevojave të tij, edhe gjatë një incidenti me kërcënim dhune nga një i burgosur tjetër.

Vendimi u mor edhe pse ish-e dashura e Combs, Virginia ‘Gina’ Huynh — e njohur si Viktima 3 — kishte dërguar një letër në mbështetje të lirimit të tij me kusht.