SHBA dhe Kina shtyjnë për 90 ditë rritjen e tarifave tregtare

Të Tjera | 12.08.2025 Ora 8:22

Shtetet e Bashkuara dhe Kina kanë rënë dakord të zgjasin për 90 ditë afatin për mosrritjen e tarifave mbi mallrat e njëra-tjetrës, duke shmangur përkohësisht një përshkallëzim të tensioneve tregtare. Marrëveshja u nënshkrua nga presidenti amerikan Donald Trump dhe u konfirmua nga Pekini, pas negociatave të mbajtura muajin e kaluar në Suedi.

Pa këtë vendim, tarifat amerikane mbi mallrat kineze do të rriteshin nga 30% në 54%, ndërsa Kina do të kthente tarifat mbi eksportet amerikane nga 10% në 34%.

Pavarësisht marrëveshjes, çështje të mëdha mbeten të pazgjidhura, përfshirë blerjen e naftës ruse nga Kina, eksportet e teknologjisë me përdorim të dyfishtë drejt Rusisë, dhe planin për të gjetur një pronar amerikan për platformën TikTok. Administrata amerikane ka lënë të hapur mundësinë e tarifave të reja nëse këto probleme nuk adresohen.

Vendimi për shtyrjen e tarifave vjen pas disa muajsh tensioni të lartë dhe mund të shërbejë si bazë për një takim të ardhshëm mes presidentit Trump dhe homologut të tij kinez Xi Jinping.