Një darkë e vonshme dhe e rëndë shpesh na sjell pagjumësi, por shkencëtarët thonë se cilësia e gjumit nuk varet vetëm nga vakti i fundit, por nga ushqyerja gjatë gjithë ditës.

Studime të shumta kanë treguar se ushqimet e pasura me triptophan – një aminoacid që trupi e përdor për të prodhuar serotonin dhe më pas melatonin – mund të përmirësojnë gjumin. Ky element gjendet te qumështi, vezët, peshku, arrat, farat, bishtajoret dhe drithërat. Kur kombinohet me karbohidrate të shëndetshme si drithërat integrale, trupi e përthith më lehtë, duke ndihmuar sistemin nervor të qetësohet.

Një dietë e pasur me fruta, perime dhe fibra është lidhur me gjumë më të thellë, më pak simptoma të pagjumësisë dhe më pak shqetësime gjatë natës. Studime të fundit kanë sugjeruar gjithashtu që lëngu i qershive, kivi apo qumështi i ngrohtë para gjumit mund të kenë efekte pozitive. Po ashtu, magnezi – që gjendet tek perimet me gjethe jeshile, arrat dhe farat – ndihmon në uljen e nivelit të kortizolit, hormonit të stresit, duke e bërë gjumin më të qetë.

Megjithatë, ekspertët theksojnë se nuk ka një “ushqim magjik” që garanton gjumë të mirë. Ajo që ka rëndësi është dietë e balancuar, e pasur me produkte bimore, orare të rregullta ushqimi, aktivitet fizik dhe shmangia e vakteve të rënda vonë në mbrëmje.

Në fund, kujdesi për dietën është vetëm një pjesë e mozaikut: gjumi ndikohet edhe nga aktiviteti fizik, shëndeti mendor dhe ekspozimi ndaj dritës.