Një sërë studimesh të fundit sugjerojnë se rritja dhe jetesa pranë kafshëve kanë një efekt mbrojtës ndaj disa sëmundjeve që po bëhen gjithnjë e më të zakonshme në botën moderne, përfshirë astmën, alergjitë, ekzemat dhe disa gjendje autoimune.

Shembulli më i njohur është ai i Amishëve në SHBA, të cilët vazhdojnë të jetojnë në kontakt të ngushtë me kafshët e fermës. Për dallim nga Huteritët, të cilët kanë adoptuar bujqësinë industriale, fëmijët Amish kanë shumë më pak raste astme dhe alergjish. Analizat kanë treguar se sistemi i tyre imunitar është më i balancuar falë ekspozimit të hershëm ndaj mikrobeve që vijnë nga kafshët dhe ambienti i fermës.

Ky efekt mbrojtës është vërejtur edhe në komunitete të tjera, përfshirë fermerët alpinë dhe Irish Travellers, të cilët kanë mikrobioma më të ngjashme me popullsitë tradicionale që jetojnë ende në kontakt të drejtpërdrejtë me natyrën. Studiuesit e quajnë këtë fenomen “efekti mini-fermë”: sa më shumë kafshë të kesh rreth e rrotull në fëmijëri, aq më i ulët është rreziku për të zhvilluar alergji më vonë.

Një analizë e gjerë e publikuar në vitin 2025, që përfshiu afro 280 mijë persona, gjeti se fëmijët me predispozitë gjenetike për ekzemë kishin më pak gjasa ta zhvillonin atë nëse kishin jetuar me një qen gjatë viteve të para të jetës.

Shkencëtarët theksojnë se kafshët shtëpiake nuk e ndryshojnë drejtpërdrejt mikrobiomën tonë, por kontakti i vazhdueshëm me mikrobet që bartin ato stimulon imunitetin dhe e ndihmon të zhvillohet në mënyrë më të shëndetshme. Përveç kësaj, kafshët nxisin një stil jete më aktiv dhe ekspozim më të madh ndaj natyrës – të dyja faktorë të rëndësishëm për një sistem imunitar të fortë.

Ky zbulim shton një arsye tjetër pse kafshët janë kaq të vlefshme në jetën tonë: përveç dashurisë dhe shoqërisë që ofrojnë, ato mund të jenë edhe një aleat i fortë për shëndetin tonë afatgjatë.