Ekspertët: Barnat për humbje peshe si Ozempic dhe Wegovy ulin yndyrën, por mund të dëmtojnë muskujt

Shëndeti | 29.08.2025 Ora 9:30

Mbi 15 milionë amerikanë po përdorin barnat GLP-1 për të rënë nga pesha, si Ozempic, Wegovy dhe Mounjaro. Studimet tregojnë se këto ilaçe janë efektive në uljen e yndyrës, por deri në 60% e peshës së humbur mund të jetë masë muskulore. Kjo sjell rrezik të dobësisë, sidomos tek personat mbi 65 vjeç që janë më të ndjeshëm ndaj humbjes së muskujve (sarkopenisë).

Mjekët theksojnë se krahas përdorimit të barnave, është thelbësore të ushtrohet aktivitet fizik i rregullt, sidomos stërvitje me pesha për të ruajtur forcën muskulore, shëndetin e kockave dhe metabolizmin. Rekomandohet forcim tre herë në javë dhe ushtrime aerobike në ditët e tjera.

Gjithashtu, pacientët duhet të konsumojnë mjaftueshëm proteina (rreth 1–1.2 g për kg peshë trupore në ditë) dhe të planifikojnë vakte para dhe pas ushtrimeve për të parandaluar dobësimin e mëtejshëm të muskujve.