Popullsia e luanëve në rritje në Indi: Një problem vdekjeprurës.

Të Tjera | 01.09.2025 Ora 7:53

Një fëmijë pesëvjeçar humbi jetën në shtetin Gujarat të Indisë pasi u sulmua nga një luan, konfirmon CNN. Babai i tij rrëfeu se familja tentoi ta shpëtonte duke hedhur gurë dhe shkopinj, por kafsha e tërhoqi të voglin në pyll, ku më pas u gjet i pajetë.

Ky rast është pjesë e një rritjeje të shqetësimit publik: në pesë vitet e fundit, mbi 20 persona janë vrarë nga luanët, ndërkohë që sulmet ndaj bagëtive janë pothuajse dyfishuar. Popullsia e luanëve aziatikë është rritur me 30% falë përpjekjeve për mbrojtjen e tyre, duke arritur në 891 individë. Por rritja e numrit ka sjellë zhvendosjen e tyre jashtë zonave të mbrojtura, duke hyrë në kontakt të drejtpërdrejtë me komunitetet lokale.

Kjo situatë ka hapur debat mes ekspertëve për nevojën e zhvendosjes së një pjese të luanëve në rezerva të tjera, për të shmangur konflikte të reja tragjike. Pa një planifikim të qartë, një histori suksesi në ruajtjen e natyrës mund të kthehet në një problem të madh për jetën e njerëzve që ndajnë hapësirën me këta gjigantë të egër.