Trafiku Urban zgjeron orarin e kioskeve të biletave në Prishtinë

Vendi | 03.09.2025 Ora 8:09

Me qëllim të lehtësimit të qasjes së qytetarëve në bileta të udhëtimit, Trafiku Urban i Prishtinës ka njoftuar për zgjerimin e orarit të punës në disa prej kioskeve të tij.

Sipas njoftimit, kioskat pranë Komunës dhe Katedrales do të jenë të hapura nga e hëna deri të shtunën prej orës 07:00 deri në 21:00, si dhe të dielave nga ora 08:00 deri në 16:00.

Kioska në Bregu të Diellit do të funksionojë nga e hëna në të premte prej 07:00 deri në 21:00, si dhe të shtunave deri në orën 14:00.

Janë përcaktuar edhe pauzat ditore: paradite nga 10:00 – 10:30 dhe pasdite nga 17:30 – 18:00.

Një tjetër lehtësi e re është që pensionistët tani mund të pajisen me bileta edhe në pikën në Bregun e Diellit.

Nga kompania kanë falënderuar qytetarët për mirëkuptimin dhe bashkëpunimin, duke theksuar përkushtimin për të qenë gjithmonë më afër nevojave të udhëtarëve.