Policia e Kosovës ka bërë të ditur se është funksionalizuar integrimi i Sistemit Informativ të Policisë së Kosovës (SIPK) me platformën e-Kosova, duke ua lehtësuar qytetarëve qasjen në informatat për gjobat dhe masat në trafik.

Përmes këtij shërbimi, qytetarët do të njoftohen përmes e-Kosovës dhe mesazheve SMS sapo gjoba të regjistrohet në sistem. Ata gjithashtu do të mund të informohen për gjobat dhe masat mbrojtëse të shqiptuara ndaj tyre.

Ndërkaq, pronarët e bizneseve do të kenë mundësi të qasen në raporte që përfshijnë gjobat e papaguara, masat mbrojtëse, përfshirë konfiskimin ose anulimin e patentë-shoferit, si dhe pikët negative të regjistruara në sistem.

Sipas Policisë së Kosovës, ky integrim synon të rrisë transparencën, të lehtësojë qasjen në informata dhe të përmirësojë komunikimin me qytetarët.