I lindur më 16 shtator 1925 në një plantacion në Mississippi, Riley B. King – i njohur më vonë si BB King – u bë simbol i një zhanri të tërë falë zërit të tij të fuqishëm, teksteve shpirtërore dhe tingullit unik të kitarës së tij, të cilën e quante “Lucille”.

Karriera e tij përfshin:

• 15 çmime Grammy

• Medaljen Presidenciale të Lirisë

• Anëtarësimin në Rock & Roll Hall of Fame dhe Blues Hall of Fame

Përveç suksesit ndërkombëtar, BB King mbeti i lidhur ngushtë me qytetet e jugut të SHBA-së që e formuan si artist. Indianola – vendlindja e tij – këtë vit organizon parada, koncerte dhe ekspozita speciale, përfshirë edhe një eksperiencë hologram ku King “performon” përsëri. Ndërkohë, Beale Street në Memphis, aty ku nisi rrugëtimi i tij muzikor në vitin 1947, do të festojë me “Birthday Bash” më 14 shtator.

BB King la pas një trashëgimi që shkon përtej muzikës: ai e bëri blues-in të dëgjohet e të respektohet në gjithë botën. Për shumë njerëz, ai mbetet ambasadori i përjetshëm i këtij zhanri muzikor.