Organizata Botërore e Shëndetësisë paralajmëron se deri në vitin 2030 do të mungojnë rreth 4.5 milion infermierë në mbarë botën, ndërkohë që një në tre infermierë tashmë shfaq shenja lodhjeje profesionale dhe sektorit i mungon fuqia punëtore.

Në këtë sfidë po hyn Nurabot, një robot infermier i fuqizuar nga inteligjenca artificiale, i zhvilluar nga gjiganti tajvanez Foxconn në bashkëpunim me Kawasaki Heavy Industries dhe NVIDIA. Roboti është dizajnuar për të kryer detyra të përsëritura dhe fizike – si shpërndarja e barnave, transportimi i mostrave apo orientimi i pacientëve – duke ulur ngarkesën e punës së infermierëve deri në 30%.

Aktualisht, Nurabot është në fazë testimi në Spitalin e Veteranëve në Taichung, Tajvan, dhe pritet të dalë në treg në fillim të vitit 2026. Falë sensorëve dhe sistemeve të avancuara të AI-së, ai lëviz në mënyrë autonome, ruan sigurinë e barnave dhe reagon ndaj udhëzimeve verbale dhe fizike të personelit.

Ekspertët theksojnë se, ndonëse robotë të tillë nuk zëvendësojnë kujdesin dhe gjykimin profesional të infermierëve, ata mund të lirojnë kohën e tyre për detyrat që kërkojnë përvojë dhe kontakt njerëzor. Megjithatë, sfida mbeten: nga dizajni i spitaleve që shpesh nuk është i përshtatshëm për robotët, deri te nevoja për siguri, protokolle etike dhe mbrojtje të të dhënave.

Sipas Foxconn, Nurabot nuk është “zëvendësim”, por një partner në misionin për t’u përballur me krizën e shëndetësisë dhe plakjen e popullsisë, e cila po rrit presionin mbi sistemet shëndetësore në mbarë botën.