Peja përballet me reduktime të ujit të pijshëm, Hidrodrini: Nivel i ulët i ujit në burime, s’ka zbritje në fatura

Vendi | 23.09.2025 Ora 7:51

Komuna e Pejës po përballet me reduktime të vazhdueshme të ujit të pijshëm që nga java e kaluar. Kompania Rajonale e Ujësjellësit “Hidrodrini” ka njoftuar se reduktimet janë të domosdoshme për shkak të nivelit të ulët të ujit në burime, të shkaktuara nga mungesa e reshjeve dhe thatësirat.

Sipas njoftimit, kjo masë do të vazhdojë për një kohë të pacaktuar, derisa të përmirësohen kushtet klimatike. Ndërkohë, furnizimi me cisterna për zonat më të prekura nuk është aktivizuar, pasi oraret e reduktimeve nuk e imponojnë një ndërhyrje të tillë, por mbetet një opsion në rast nevoje.

“Hidrodrini” ka bërë të ditur gjithashtu se nuk do të ketë zbritje në faturat mujore për konsumatorët, pasi regjistrohet vetëm uji i shpenzuar në ujëmatës.

Kompania ka konfirmuar se është në kontakt të vazhdueshëm me institucionet qeveritare dhe se po punon në plane afatgjata për të shmangur situata të ngjashme në të ardhmen.