Linja hekurudhore Shkup–Prishtinë pritet të nisë funksionimin deri në fund të vitit 2027, ndërsa udhëtimi mes dy kryeqyteteve parashihet të zgjasë rreth 50 minuta.

Zëvendëskryeministri dhe ministri i Transportit i Maqedonisë së Veriut, Aleksandar Nikolloski, ka thënë se funksionalizimi i linjës varet nga përfundimi i punimeve në hekurudhën e Kosovës, ku ende duhet të përfundojë një tunel.

Sipas tij, kjo linjë mund të ndihmojë në uljen e trafikut dhe të ndotjes së ajrit në Shkup.

Ndërkohë, profesori i ekonomisë në Universitetin e Tetovës, Ruzhdi Matoshi, vlerëson se rikthimi i transportit hekurudhor do të ndikojë pozitivisht në zhvillimin ekonomik, lëvizjen e qytetarëve dhe lidhjet rajonale.