548 raste të reja me tuberkuloz në Kosovë gjatë vitit 2024

Vendi | 26.09.2025 Ora 8:00

Ministria e Shëndetësisë ka njoftuar se gjatë vitit 2024 në Kosovë janë regjistruar 548 raste të reja me tuberkuloz, me një incidencë prej 34.3 për 100,000 banorë. Këto të dhëna janë bërë publike në Ditën Botërore të Mushkërive, e cila sivjet shënohet me moton “Mushkëri të shëndetshme, jetë e shëndetshme”.

Sipas Ministrisë, tuberkulozi mbetet një sfidë e rëndësishme për shëndetin publik në vend, por diagnostikimi dhe trajtimi i tij ofrohen falas në institucionet publike shëndetësore.

Përveç tuberkulozit, edhe sëmundje të tjera të organeve të frymëmarrjes, si astma dhe bronkiti kronik, mbeten shkaktarë të shëndetësisë së dobët dhe vdekshmërisë në vend.

Në nivel global, raportet tregojnë se miliona persona çdo vit preken nga sëmundje respiratore si sëmundja pulmonare obstruktive kronike (SPOK), pneumonia, astma, tuberkulozi dhe kanceri i mushkërive, të cilat vazhdojnë të jenë ndër shkaqet kryesore të vdekjeve.