YouTube ka njoftuar se nga kjo javë do të fillojë procesin e ri që u mundëson përdoruesve të mëparshëm, të cilët janë ndaluar nga platforma, të krijojnë llogari të reja dhe të rikthejnë disa nga videot e tyre, nëse ato nuk shkelin më rregullat aktuale të YouTube-it.

Ky vendim vjen pas hetimeve nga ligjvënës republikanë në SHBA, të cilët kanë akuzuar administratën e presidentit Joe Biden për presion ndaj kompanive teknologjike për të kufizuar përmbajtje të caktuara, përfshirë ato që përmbanin dezinformata për Covid-19 apo zgjedhjet e vitit 2020.

YouTube thekson se përdoruesit që do të rikthehen, duhet të aplikojnë të paktën një vit pas mbylljes së kanalit të tyre, dhe se procesi i rishikimit do të jetë i kujdesshëm. Ata që kanë shkelur ligjin për të drejtat e autorit apo kanë shpërndarë përmbajtje të dëmshme, nuk do të përfshihen në këtë program.

Përdoruesit e aprovuar do të nisin nga e para – pa kanalet e vjetra apo ndjekësit, por me mundësinë për të fituar të ardhura nga videot, nëse plotësojnë kushtet e YouTube Partner Program.

YouTube e justifikon vendimin si një “angazhim për lirinë e shprehjes” dhe thotë se edhe vetë platforma “ka evoluar gjatë 20 viteve të fundit”.
Megjithatë, shumë analistë vlerësojnë se kjo lëvizje lidhet edhe me presionin politik dhe me tendencën e kompanive të mëdha teknologjike për të zbutur politikat e moderimit të përmbajtjes.