Kryetari i Komunës së Prishtinës, Përparim Rama, ka prezantuar një projekt të ri që synon transformimin e hapësirave të harruara të kryeqytetit në rezidenca kreative për artistë nga mbarë bota.

Sipas Ramës, qëllimi është që këto hapësira të shndërrohen në qendra ku do të ndërthuren kultura të ndryshme, ide të reja dhe bashkëpunime ndërkombëtare.

“Po nisim një projekt vizionar: transformimi i hapësirave të harruara në rezidenca kreative për artistë nga mbarë bota. Këto hapësira do të kthehen në vende ku takohen kultura, ide të reja dhe bashkëpunime ndërkombëtare. Krejt kjo në bashkëpunim me artistin me renome ndërkombëtare Sisley Xhafa,” ka shkruar Rama.

Projekti, që realizohet në bashkëpunim me artistin e njohur ndërkombëtar Sisley Xhafa, pritet të sjellë një frymë të re në jetën kulturore të Prishtinës dhe të forcojë lidhjet e saj me skenën artistike globale.