Një tërmet me magnitudë 7.5 goditi mbrëmjen e së hënës brigjet verilindore të Japonisë, duke shkaktuar më shumë se 30 të lënduar dhe duke detyruar autoritetet të urdhërojnë evakuimin e mbi 114 mijë personave. Dridhjet u ndjenë deri në Tokio, më shumë se 400 milje larg epiqendrës.

Agjencia Meteorologjike e Japonisë lëshoi paralajmërim për tsunami, ndërsa valët e matura arritën deri në 70 centimetra në disa zona, shumë më pak se sa pritej fillimisht. Paralajmërimi u hoq në orët e mëngjesit.

Raportohet për ndërprerje të energjisë, mbyllje rrugësh dhe pezullim të linjave të trenave në rajonet Aomori dhe Iwate. Ndërkohë, nuk ka shenja të dëmtimeve në centralet bërthamore të zonës.

Kryeministrja Sanae Takaichi tha se qeveria po punon me autoritetet lokale për të vlerësuar dëmet dhe për të koordinuar masat emergjente, duke paralajmëruar se lëkundje të tjera të fuqishme mund të pasojnë.