SHBA ka ndryshuar politikën e vaksinimit për foshnjat, pasi Komiteti Këshillimor për Praktikat e Imunizimit (ACIP) votoi heqjen e rekomandimit universal që vaksina kundër Hepatitit B të aplikohet menjëherë pas lindjes për foshnjat e lindura nga nëna negative për virusin. Vaksinimi në lindje mbetet i detyrueshëm vetëm për foshnjat e nënave pozitive, ndërsa për të tjerat vendimi do të merret nga prindërit në konsultim me mjekun dhe doza e parë mund të jepet pas moshës dy muaj.

Presidenti Donald Trump e ka mbështetur këtë vendim dhe ka nënshkruar një memorandum që kërkon rishikimin e gjithë kalendarit kombëtar të vaksinimit të fëmijëve, duke e krahasuar me praktikat e vendeve të tjera të zhvilluara. Vendimi ka ngritur alarm te ekspertët shëndetësorë, të cilët paralajmërojnë se heqja e vaksinimit universal në lindje mund të rrisë infeksionet, pasi testimi i nënave nuk është gjithmonë i plotë apo i saktë dhe infektimi i foshnjave çon në forma kronike në shumicën e rasteve. Mjekët theksojnë se politika e aplikuar që nga viti 1991 ka shpëtuar dhjetëra mijëra jetë, ndërsa ndryshimi rrezikon të dëmtojë një nga arritjet më të mëdha të shëndetit publik në SHBA.