Volvo, marka e njohur për inovacionet në sigurinë rrugore, ka prezantuar një ide të re që synon të ulë shpërqendrimin e shoferëve: një font të ri të dizajnuar posaçërisht për ekranet e veturave.

Fonti, i quajtur Volvo Centum, është zhvilluar në bashkëpunim me studion tipografike Dalton Maag dhe është krijuar për të qenë sa më i lexueshëm gjatë vozitjes. Ai redukton “zhurmën vizuale” dhe ndihmon sytë e shoferit të fokusohen vetëm te informacioni i rëndësishëm.

Sipas Volvo-s, dizajni i shkronjave ndikon drejtpërdrejt në lëvizjen e syve, duke zvogëluar kohën që shoferi kalon duke parë ekranin. Kjo është e rëndësishme, pasi studimet tregojnë se shoferët shpenzojnë deri në 40 sekonda duke parë ekranet qendrore gjatë vozitjes.

Fonti i ri do të prezantohet për herë të parë në modelin Volvo EX60, i cili pritet të dalë në fillim të vitit 2026, si pjesë e përgatitjeve për 100-vjetorin e kompanisë në vitin 2027.

Megjithëse iniciativa është vlerësuar si pozitive, disa kritikë theksojnë se rikthimi i butonave fizikë do të ishte një zgjidhje edhe më efektive për sigurinë në trafik.