Prodhuesi francez i veturave, Citroën, ka prezantuar një koncept të ri elektrik të modelit legjendar 2CV, me synimin për të tërhequr më shumë blerës në një treg gjithnjë e më konkurrues.

Vetura e re u prezantua në Panairin e Automjeteve në Paris dhe ruan elemente karakteristike të modelit origjinal, përfshirë formën e rrumbullakët të kulmit, fenerët dhe harqet e theksuara të rrotave.

Modeli i ri është ende në fazën konceptuale dhe nuk është gati për shitje. Citroën synon që një version përfundimtar të jetë në sallonet e shitjes deri në vitin 2028. Çmimi i parashikuar është rreth 13 mijë paund.

Modeli origjinal 2CV u prezantua në vitin 1948 dhe u projektua si një veturë e lirë, praktike dhe e lehtë për t'u riparuar, veçanërisht për fermerët dhe banorët e zonave rurale. Për shkak të popullaritetit, ai qëndroi në prodhim për më shumë se 40 vjet dhe u shndërrua në një ikonë të industrisë automobilistike.

Rikthimi i modeleve të njohura nga e kaluara është bërë një strategji gjithnjë e më e përdorur nga prodhuesit evropianë të veturave elektrike. Edhe Renault, Fiat, BMW dhe Volkswagen kanë prezantuar modele moderne që ruajnë elemente të dizajnit klasik.

Kjo strategji synon t'i bëjë veturat elektrike më tërheqëse për konsumatorët, në një kohë kur prodhuesit evropianë po përballen me konkurrencë në rritje nga kompanitë kineze.

Megjithatë, ekspertët vlerësojnë se dizajni nostalgjik nuk mjafton për sukses. Modeli i ri duhet të ofrojë edhe çmim konkurrues, funksionalitet dhe teknologji moderne për të fituar interesin e blerësve.