Thirrja për protestë vjen pas kërkesës së KESCO-s drejtuar Zyrës së Rregullatorit për Energji për rritjen e tarifave të energjisë elektrike për 21 për qind, kërkesë e cila aktualisht është në proces shqyrtimi nga ZRRE-ja.

Organizatorët kanë kritikuar KEDS-in dhe ZRRE-në për, siç thonë ata, shtrenjtimin e vazhdueshëm të faturave të energjisë në kurriz të qytetarëve. Sipas tyre, që nga viti 2022 çmimi i energjisë elektrike është rritur çdo vit, ndërsa për këtë vit paralajmërohet një rritje e re rreth 20 për qind, pas shtrenjtimit prej 16.1 për qind në vitin e kaluar.

Aktivistët vlerësojnë se qytetarët po përballen jo vetëm me koston e energjisë, por edhe me pasojat e humbjeve dhe keqmenaxhimit, në një kohë kur ndërprerjet e rrymës dhe rritja e kostos së jetesës vazhdojnë të jenë problem i përditshëm.

Ata kërkojnë refuzimin e kërkesës për rritje të çmimeve, nisjen e procesit për rikthimin e KEDS-it në pronësi publike dhe përmbushjen e kërkesave të sindikatës.