Sektori i turizmit në Kosovë ka shënuar rritje të qëndrueshme edhe në fund të vitit 2025. Sipas të dhënave të Agjencisë së Statistikave të Kosovës, vetëm gjatë muajit dhjetor janë regjistruar 68 293 vizitorë në hotelet e vendit, që përfaqëson një rritje prej 6,1 për qind krahasuar me të njëjtin muaj të vitit 2024.

Nga numri i përgjithshëm, 27 776 ishin vizitorë vendorë, ndërsa 40 517 vizitorë erdhën nga jashtë vendit, duke dëshmuar rritjen e vazhdueshme të interesimit ndërkombëtar për Kosovën si destinacion turistik.

Numri i net-qëndrimeve gjatë këtij muaji arriti në 132 148, ku 54,2 për qind u realizuan nga vizitorët e huaj dhe 45,8 për qind nga vendorët. Kjo tregon se turistët e huaj jo vetëm po e vizitojnë Kosovën më shpesh, por po qëndrojnë edhe më gjatë.

Rajoni i Pejës mbetet destinacioni më i frekuentuar për vizitorët vendorë, me 9 655 vizitorë dhe 26 550 net-qëndrime, falë potencialit turistik të Rugovës dhe resorteve dimërore.

Ndërkohë, Kosova po fiton vëmendje edhe në mediat ndërkombëtare. E përditshmja britanike The Guardian e ka përfshirë Kosovën në listën e vendeve që duhet vizituar, duke vënë në pah Via Dinarica, bukurinë e maleve, biodiversitetin dhe liqenet malore pranë kufirit me Shqipërinë.

Dhjetori 2025 e mbylli vitin me bilanc pozitiv për turizmin dhe hotelerinë në Kosovë, ndërsa pritjet janë që trendi i rritjes të vazhdojë edhe gjatë vitit 2026.