Sipas skemës së re, migrantët do të mund të aplikojnë për një vizë qëndrimi njëvjeçare, e cila mund të rinovohet. Procesi i aplikimit pritet të zhvillohet nga fillimi i prillit deri në fund të qershorit, ndërsa aplikuesit duhet të dëshmojnë se kanë qëndruar në vend për të paktën pesë muaj dhe të mos kenë precedent penal.

Autoritetet spanjolle thonë se iniciativa ka për qëllim të ndihmojë migrantët që jetojnë dhe punojnë në vend pa status ligjor, por edhe të forcojë ekonominë, pasi punëtorët e huaj kanë rol të rëndësishëm në sektorë si bujqësia, turizmi, kujdesi për të moshuarit dhe shërbimet.

Sipas të dhënave zyrtare, të huajt përbëjnë rreth 14% të fuqisë punëtore në Spanjë, ndërsa një pjesë e konsiderueshme e rritjes ekonomike në vitet e fundit lidhet me kontributin e tyre.

Megjithatë, iniciativa ka nxitur edhe debat politik në vend, pasi kritikët paralajmërojnë se mund të inkurajojë migracion të ri, ndërsa qeveria thekson se procesi do të zhvillohet në mënyrë të kontrolluar dhe me afat të përcaktuar.