Prokuroria Themelore në Prishtinë ka njoftuar se janë sekuestruar rreth 100 mijë euro pasuri, që dyshohet se janë përfituar nga veprimtari kriminale në fushën e mashtrimeve kompjuterike.

Operacioni është zhvilluar në koordinim me Policia e Kosovës, konkretisht me Drejtorinë për Hetimin e Krimeve Kibernetike, si dhe në bashkëpunim me autoritetet gjermane.

Sipas njoftimit, pasuria e sekuestruar dyshohet të jetë rezultat i aktiviteteve të paligjshme të personave të përfshirë në këtë rast. Me urdhër të Prokurorit të Shtetit, është vendosur masë ndaluese ndaj kësaj pasurie dhe janë njoftuar edhe bankat komerciale në Kosovë.

Autoritetet kanë theksuar se hetimet do të vazhdojnë, ndërsa institucionet mbeten të përkushtuara në luftën kundër krimeve kibernetike, në bashkëpunim me partnerët vendorë dhe ndërkombëtarë.