Universi i Fast & Furious po zgjerohet edhe në televizion, pasi Vin Diesel ka konfirmuar se një serial i ri është në zhvillim për platformën Peacock.

Aktori e bëri njoftimin gjatë prezantimit të NBCUniversal në New York, duke treguar se seriali do të ruajë frymën e aksionit dhe lidhjen familjare që ka karakterizuar sagën ndër vite.

Projekti do të drejtohet nga Mike Daniels dhe Wolf Coleman, të cilët do të jenë bashkëautorë dhe producentë ekzekutivë të episodit pilot. Në ekipin e producentëve përfshihen edhe Vin Diesel, Neil Moritz dhe Chris Morgan.

Sipas raportimeve të Variety, aktualisht vetëm një serial ka marrë dritën jeshile për prodhim, ndërsa projekte të tjera të lidhura me universin “Fast & Furious” mbeten ende në zhvillim.

Franshiza ka qenë një nga më fitimprurëset në Hollywood, me 11 filma dhe mbi 7 miliardë dollarë fitime globale. Ndërkohë, filmi i ardhshëm i sagës, Fast Forever, pritet të publikohet në vitin 2028.

Filmi i parë i serisë, i lansuar në vitin 2001 nga Universal Pictures, feston këtë vit 25-vjetorin me një shfaqje speciale në Cannes Film Festival.