Ekspertët kanë kërkuar masa më të forta kundër varësisë nga nikotina, përfshirë kufizime më të ashpra në reklamim, shitje dhe taksim të produkteve të reja të nikotinës, si cigaret elektronike.

Sipas drejtorit të përgjithshëm të World Health Organization, Tedros Adhanom Ghebreyesus, duhani vazhdon të shkaktojë mbi 7 milionë vdekje në vit, ndërsa produktet e reja të nikotinës po krijojnë forma të reja varësie, veçanërisht tek të rinjtë.

Shqetësim është ngritur edhe në Kosovë, ku raportimet tregojnë se cigaret elektronike konsumohen dhe shiten afër shkollave, shpesh edhe tek fëmijët.

Pulmologu Besim Morina ka paralajmëruar se niveli i lartë i nikotinës në këto produkte mund të krijojë varësi serioze dhe pasoja në mushkëri, zemër, tru dhe shëndetin psikik.

Ndërkohë, në Kosovë po shqyrtohen ndryshime në Ligjin për Kontrollin e Duhanit, por deri tani është pranuar vetëm rekomandimi për ndalimin e aromave dhe shijeve në cigaret elektronike.