Pas pushimeve verore, rikthimi në punë mund të jetë i vështirë, sidomos kur përballeni me një inbox të mbushur me email-e dhe një rutinë krejtësisht ndryshe nga ajo e pushimeve.

Ekspertët sugjerojnë disa mënyra të thjeshta për ta bërë këtë tranzicion më të lehtë.

Niseni me detyra të vogla. Në vend që të përpiqeni menjëherë të përfundoni punët më të vështira, filloni me detyra të shpejta dhe të menaxhueshme. Kjo ndihmon në krijimin e ritmit dhe shmang ndjenjën e mbingarkesës.

Mos kërkoni shumë nga vetja ditën e parë. Nëse është e mundur, përdoreni ditën e parë për t’u rikthyer gradualisht në rutinë, për të kontrolluar email-et dhe për të organizuar prioritetet.

Merrni me vete diçka nga pushimet. Një shëtitje në mbrëmje, leximi para gjumit, më shumë kohë jashtë apo një aktivitet që ju ka relaksuar gjatë pushimeve mund të ndihmojë edhe pas kthimit në punë.

Mos merrni vendime të nxituara. Nëse pas pushimeve ndiheni të pakënaqur me punën, mos nxitoni menjëherë ta lini atë. Ekspertët rekomandojnë të vlerësoni nëse është thjesht lodhje nga rikthimi në rutinë apo një pakënaqësi që vazhdon për një kohë më të gjatë.

Planifikoni pushimet e ardhshme. Vetë pritja për një pushim të ardhshëm mund të ndikojë pozitivisht në mirëqenie. Sipas ekspertëve, pushimet më të shkurtra, por më të shpeshta, mund të jenë më të dobishme sesa një pushim i gjatë i vetëm.

Aktivitetet si ecja, çiklizmi, noti dhe eksplorimi i vendeve të reja gjithashtu mund t’ju ndihmojnë të ktheheni më të freskët nga pushimet.