Një valë e hershme dhe intensive e të nxehtit ka përfshirë Europën Perëndimore, duke sjellë temperatura rekord për muajin maj dhe paralajmërime për përkeqësim të situatës në ditët në vijim.

Në Francë, mbi 20 qytete kanë regjistruar temperaturat më të larta ndonjëherë për muajin maj, ndërsa autoritetet kanë vendosur 31 rajone në alarm për vapë. Ky është aktivizimi i parë i sistemit të alarmit për temperatura të larta në muajin maj që nga viti 2004.

Edhe në Mbretërinë e Bashkuar janë thyer rekorde historike, pasi pranë Londrës është regjistruar temperatura prej 33.5°C, ndërsa në disa zona pritet të arrijë deri në 35°C.

Situata mbetet e rënduar edhe në Spanjë, ku temperaturat kanë arritur deri në 38°C dhe pritet të afrohen në 40°C gjatë ditëve të ardhshme.

Meteorologët thonë se fenomeni është shkaktuar nga një “kupolë nxehtësie”, ku masat e ajrit të nxehtë nga Afrika e Veriut bllokohen mbi Europë. Ekspertët paralajmërojnë se valë të tilla të të nxehtit mund të bëhen më të shpeshta dhe më intensive për shkak të ndryshimeve klimatike.