Inteligjenca artificiale po përdoret gjithnjë e më gjerësisht në spitalet evropiane, duke ndihmuar në diagnostikimin e sëmundjeve dhe organizimin e shërbimeve shëndetësore. Megjithatë, Organizata Botërore e Shëndetësisë (OBSH) paralajmëron se mungesa e rregullave dhe mbikëqyrjes për përdorimin e saj mund të krijojë rreziqe serioze për pacientët.

Drejtori rajonal i OBSH-së për Evropën, Hans Kluge, tha se hendeku mes zhvillimit të shpejtë të inteligjencës artificiale dhe rregullimit të saj është një nga sfidat më të mëdha të momentit.

Sipas OBSH-së, dy të tretat e 53 vendeve të Rajonit Evropian tashmë përdorin AI për diagnostikim, ndërsa rreth gjysma kanë chatbot-e për komunikimin me pacientët. Megjithatë, vetëm një në 12 vende ka një strategji të posaçme për qeverisjen e kësaj teknologjie, ndërsa afro 40% nuk kanë udhëzime etike për përdorimin e saj.

OBSH thekson gjithashtu se trajnimi i profesionistëve shëndetësorë mbetet i pamjaftueshëm. Vetëm një në pesë vende përfshin inteligjencën artificiale në edukimin e studentëve të mjekësisë, ndërsa vetëm një në katër ofron trajnime për personelin shëndetësor.

Organizata planifikon të prezantojë në vitin 2028 një udhërrëfyes për përdorimin e sigurt të inteligjencës artificiale në shëndetësi, me synim mbrojtjen e pacientëve dhe rritjen e besueshmërisë së kësaj teknologjie.