Sam Altman, drejtori ekzekutiv i OpenAI, ka deklaruar se Donald Trump dhe Xi Jinping mund të meritojnë Çmimin Nobel për Paqe nëse arrijnë një marrëveshje për sigurinë e inteligjencës artificiale. Në një intervistë për “Fortune”, Altman tha se një marrëveshje mes SHBA-së dhe Kinës për të shmangur marrjen e rreziqeve të caktuara gjatë zhvillimit të AI-së “do të ishte e mrekullueshme”. Sipas tij, pavarësisht konkurrencës së fortë mes dy vendeve, ato duhet të jenë në gjendje të bien dakord për disa rregulla bazë të sigurisë së AI-së.

Deklarata e Altman vjen në prag të takimit të planifikuar mes Trump dhe Xi në Shtëpinë e Bardhë më 24 shtator. Presidenti amerikan ka shprehur prej kohësh pretendimin se e meriton Çmimin Nobel për Paqe, ndërsa Altman e sheh bashkëpunimin SHBA-Kinë për sigurinë e AI-së si një hap që mund të ketë rëndësi të madhe globale. Ai theksoi se një marrëveshje e tillë, sipas tij, nuk do të ishte e komplikuar dhe mund të përmblidhej edhe në “një dokument njëfaqësh”.