Dhoma e Përfaqësuesve e Shteteve të Bashkuara ka miratuar të mërkurën një projektligj që i jep presidentit Donald Trump kompetenca të gjera për vendosjen e sanksioneve ndaj Rusisë dhe tarifa deri në 100% ndaj vendeve që blejnë naftë dhe gaz rus.

Projektligji pritet t’i dërgohet presidentit Trump për nënshkrim. India dhe Kina janë ndër vendet më të ekspozuara ndaj masave të mundshme, pasi janë blerës të mëdhenj të naftës ruse.

India ka përfituar për rreth katër vjet nga nafta ruse, e cila pas pushtimit të Ukrainës u zhvendos nga tregjet perëndimore drejt rafinerive indiane, shpesh me çmime më të ulëta. Sipas të dhënave të GTRI, nafta ruse përbënte 30.3% të importeve të naftës bruto të Indisë në vitin fiskal 2026, me vlerë rreth 40.8 miliardë dollarë.

Zëdhënësi i Ministrisë së Jashtme të Indisë ka thënë se vendi po i përcjell zhvillimet dhe mbetet i përkushtuar ndaj sigurisë energjetike të qytetarëve.

Ekspertët vlerësojnë se India mund të gjejë furnizues alternativë, por zëvendësimi i naftës ruse do të mund të rriste kostot e naftës, transportit dhe sigurimit. Për më tepër, tarifat amerikane mund të prekin eksportet indiane, kursin e rupisë dhe bilancin tregtar.

India importon më shumë se 88% të naftës bruto që konsumon, ndërsa sipas CEEW, zhvendosja drejt naftës ruse pas vitit 2022 i ka kursyer vendit rreth 12.6 miliardë dollarë.