Zoë Bell ka ndërtuar një nga karrierat më të veçanta në Hollywood, duke kaluar nga stuntwoman në aktore, producente, koordinatore të skenave të aksionit dhe tashmë edhe në regjisore.

Bell u bë e njohur fillimisht si zëvendësuese e aktoreve në skena të rrezikshme. Ajo ishte stuntwoman e Lucy Lawless në serialin “Xena: Warrior Princess”, ndërsa më vonë u bë edhe zëvendësuesja e Uma Thurman në filmat “Kill Bill” të Quentin Tarantinos.

Karriera e saj mori një kthesë të rëndësishme kur Tarantino e përfshiu edhe si aktore në filmin “Death Proof”, ku Bell luajti veten. Ajo realizoi edhe disa prej skenave më të rrezikshme të filmit, përfshirë një skenë ku qëndronte mbi kapakun e një makine që lëvizte me shpejtësi të madhe.

Gjatë viteve, Bell ka punuar në shumë produksione të mëdha, si interpretuese dhe koordinatore të skenave të aksionit. Ajo ishte gjithashtu koordinatore e skenave të rrezikshme në filmin e Tarantinos “Once Upon a Time… in Hollywood”.

Sipas Bell, puna e stuntwoman nuk është vetëm çështje force apo guximi, por një pjesë e rëndësishme e tregimit të një filmi. Ajo ka theksuar se skenat e aksionit kërkojnë krijimtari, përgatitje dhe bashkëpunim të madh me pjesën tjetër të ekipit.

Tash, Bell po hyn në një kapitull të ri të karrierës. Pas disa projekteve të shkurtra dhe reklamave, ajo është duke përgatitur “Free Fall”, një thriller që pritet të shënojë debutimin e saj si regjisore e një filmi të gjatë.

Në Festivalin e Filmit në Oldenburg, në Gjermani, Bell po nderohet për karrierën e saj. Për të, ky vlerësim vjen në një moment të rëndësishëm, teksa përgatitet për atë që e quan “raundi i dytë” të karrierës së saj.