Kapiteni i Holandës dhe Liverpoolit, Virgil Van Dijk, u përfshi në një debat të ashpër me disa gazetarë gjatë një konference për shtyp në Zeist. Gjithçka nisi pasi mbrojtësi hodhi poshtë si “absurditet të plotë” pretendimet se kishte qenë ideja e tij që Holanda të luante me pesë mbrojtës ndaj Marokut në Kupën e Botës, duke theksuar se një sugjerim i tillë kishte ardhur më herët nga vetë mediat.

Situata u tensionua më tej kur Van Dijk pati përplasje verbale me disa gazetarë, përfshirë Valentijn Driessen nga De Telegraaf. Gazetari e kritikoi kapitenin holandez për përgjigjet e shkurtra, ndërsa Van Dijk u kundërpërgjigj duke thënë se ishte lodhur nga pretendimet dhe kritikat e pabazuara. Mbrojtësi theksoi se nuk ka probleme me shumicën e mediave, por se ndjen nevojën të reagojë kur, sipas tij, publikohen informacione të pasakta.