Një fotografi e vetme e fytyrës mund të ndihmojë në vlerësimin e moshës biologjike dhe rrezikut të vdekjes te pacientët me kancer. Këtë e sugjeron një studim i studiuesve të Mass General Brigham në Boston, i publikuar në revistën shkencore The Lancet Digital Health.

Studiuesit zhvilluan modele të inteligjencës artificiale të trajnuara me më shumë se 40 milionë fotografi të fytyrave. Sistemi analizon tipare të caktuara të fytyrës për të vlerësuar moshën biologjike dhe, duke i kombinuar ato me të dhëna klinike, për të parashikuar rrezikun e vdekjes te pacientët me kancer.

Sipas rezultateve, në grupin e pacientëve të identifikuar nga modeli si me rrezik të lartë, 52.5 për qind vdiqën brenda 90 ditëve nga vlerësimi. Në grupin me rrezikun më të ulët, kjo përqindje ishte rreth 2 për qind.

Megjithatë, studiuesit theksojnë se teknologjia nuk synon të zëvendësojë mjekët apo vlerësimet ekzistuese klinike. Nevojiten studime të mëtejshme për të vërtetuar saktësinë dhe dobinë e saj në praktikën mjekësore.