Një qenush pesëvjeçare e quajtur Amber, që kishte ardhur në Angli nga Katari për një jetë më të mirë, ka kaluar mbi një muaj në arrati, duke përshkuar rreth 100 milje dhe duke notuar në det, para se të shpëtohej dhe të rikthehej në shtëpinë kujdestare.

Amber u zhduk vetëm një ditë pas mbërritjes në Angli, më 26 prill, pasi arriti të largohej nga një oborr me gardh të lartë prej 2.5 metrash në New Forest. Për javë të tëra, u raportuan pamje dhe video nga qytetarët që ndihmuan në gjurmimin e lëvizjeve të saj.

Pas katër javësh pa ndonjë sinjal të qartë, besohet se Amber kishte udhëtuar mbi 30 milje deri në qytetin bregdetar Poole. E pabesueshme, por ajo arriti të notojë një milje për të kaluar nga lagjja e njohur Sandbanks në ishullin Brownsea – një zonë e mbrojtur nga National Trust, ku kafshët shtëpiake nuk lejohen.

Pasi qëndroi për disa ditë në ishull, Amber u përpoq të notonte sërish drejt bregut, por u zu nga rrymat detare. Për fat të mirë, një varkë kalimtare e vuri re dhe ekuipazhi e shpëtoi – me Amber që madje u kap vetë për shkallët e varkës, duke bërë gjithçka për të mbijetuar.

Pas rikthimit në tokë, ajo u dërgua te veterineri ku rezultoi se kishte humbur peshë dhe kishte disa gërvishtje, por përndryshe ishte në gjendje të mirë.

Aktualisht, Amber ndodhet në kujdesin e familjes kujdestare dhe do të qëndrojë atje për disa javë deri sa të gjendet një familje adoptuese. Organizata bamirëse KS Rescue Angels, që menaxhoi rastin, tha se do të bëjnë kontrolle të rrepta për t’u siguruar që Amber të adoptohet nga një familje që kupton natyrën e saj aktive dhe të ndjeshme.