Rrjeti më i madh në botë për pirateri të transmetimeve sportive, Streameast, është mbyllur zyrtarisht pas më shumë se 1.6 miliardë vizitash vetëm gjatë vitit të fundit. Lajmin e ka bërë të ditur Alliance for Creativity and Entertainment (ACE), një koalicion global kundër piraterisë, i cili tha se mbyllja është realizuar në bashkëpunim me autoritetet egjiptiane.

Me mbi 80 domeine të lidhura, Streameast ofronte ndeshje nga ligat më të mëdha evropiane të futbollit, por edhe nga sportet amerikane si NFL, NBA, MLB dhe NHL. Shumë tifozë e përdornin këtë faqe për të shmangur kostot e larta të abonimeve zyrtare, të cilat shpesh kërkojnë pagesa në disa platforma të ndryshme.

Sipas ACE, ky ishte operacioni më i madh i mbylljes së një platforme ilegale të sportit live dhe është cilësuar si një fitore e madhe për ligat sportive dhe kompanitë e transmetimit. Tani, të gjitha faqet e Streameast ridrejtohen në faqen zyrtare të ACE, “Watch Legally”.